Hagnýtar upplýsingar

Hvernig er best að halda við hinum ýmsu hlutum á heimilinu til þess að minnka líkur á skemmdum og sliti.

Baðherbergi/Þvottahús

Gott loftstreymi er mikilvægt í öllum rýmum húsnæðis en sérstaklega er mikilvægt að lofta vel út úr rýmum eins og baðherbergjum og þvottahúsum þar sem mikill raki getur safnast.
Niðurföll á gólfum safna í sig óhreinindum og þarf að þrífa þau reglulega til þess að minnka líkurnar á að þau stíflist. Best er að lyfta ristinni upp og hreinsa vel öll óhreinindi.
Niðurföll í vöskum, sturtu og baði þarf einnig að hreinsa reglulega svo ekki myndist stíflur. Best er að hreinsa niðurföllin mjög reglulega með mildum hreinsiefnum til þess að koma í veg fyrir að þurfi að nota sterkari efni eins og stíflueyði.
Kísill safnast fyrir á flísum og þarf að hreinsa reglulega. Til að minnka kísilmyndun er gott að sprauta köldu vatni á sturtu/bað eftir notkun.
Matarsódi er gott hreinsiefni á erfiða bletti á baðherberginu, þ.á.m. til þess að ná kísli af hreinlætis- og blöndunartækjum. Matarsódi virkar einnig mjög vel til þess að losa um minni stíflur í vöskum og niðurföllum. Þá er nokkuð af matarsóda sett í niðurfallið og látið bíða nokkra stund, síðan er sjóðandi heitu vatni hellt þar ofan í. Einnig er hægt að nota uppþvottalög í stað matarsóda.

Eldhús

Þegar helluborð eru þrifin skal velja hreinsiefni sem er sérstaklega gert fyrir viðkomandi tegund helluborðs (keramik, span, o.s.frv.).
Til þess að þurfi að þrífa bakaraofn sjaldnar og minnka líkur á innbrunnum matarleifum er gott að hafa ofnplötu alltaf undir því sem bakað er.
Mikilvægt er að nota mild hreinsiefni á ísskáp og að afþýða frysti reglulega.
Til þess að halda góðu lofti í eldhúsinu er best að láta gufugleypinn ganga við alla matargerð, það minnkar einnig raka.

Ofnar og vatn

Passa verður að ofnlokar verði ekki fyrir hnjaski. Gerist það er hætt við að heita vatnið streymi óhindrað og valdi mjög háum hitaveitureikningum.
Mikilvægt er að hreyfa við ofnkrönum reglulega til þess að þeir festist ekki og muna verður að hreyfa þá líka yfir sumartímann.
Ef rennsli minnkar í blöndunartækjum er gott að byrja á því að hreinsa sigtin áður en farið er í að kalla út pípulagningamenn, mjög hentugt er að nýta gamla tannbursta til þess að ná burt óhreinindunum.
Aldrei má byrgja ofna með húsgögnum eða gluggatjöldum.

Gólfefni

Parket þarf alltaf að þvo með mildri sápu og litlu vatni. Best er að nánast þurrmoppa parket til þess að verja það fyrir skemmdum og til þess að minnka líkur á tuskuförum. Á plastparket má setja eina tappafylli af borðediki út í skúringavatnið til þess að minnka tuskuför.
Gólfdúk er best að þurrmoppa reglulega og skúra aðeins upp úr volgu vatni. Gólfdúk þarf einnig að bóna reglulega og fara þarf þá eftir leiðbeiningunum sem uppgefnar eru á bóninu.
Flísar eru líklega eitt sterkasta gólfefnið og þola almennt vel raka. Best er að þvo flísar með vatni og velja sápu sem gerir þær ekki of hálar.
Náttúrustein þarf að þrífa með þar til gerðum hreinsiefnum og fara eftir þeim leiðbeiningum sem með þeim fylgja. Komi hvít skán á dökkan náttúrustein er best að fara yfir hann með þurri moppu eftir skúringar til þess að þurrka upp allt aukavatn.
Kork er gott að þurrmoppa reglulega og fara svo yfir með volgu sápuvatni.
Teppi er best að þrífa með ryksugu og hreinsa svo reglulega vel með teppahreinsivél og efnum.

Innréttingar

Mikilvægt er að nota aðeins milda sápu og ekki of mikið af sápuvatni á innréttingar. Athugið að salmíak getur skemmt spónlagða fleti.

Hurðar

Hurðar þarf að rykhreinsa reglulega og séu þær lakkaðar má strjúka af þeim með mildu sápuvatni. Gott er að smyrja hjarir og læsingar reglulega.

Gluggar

Til þess að fá sem minnst för þegar rúður eru þrifnar að innan eða utan er best að setja tappafylli af borðediki í vatnið og enga sápu ef hægt er og fara svo yfir allan rúðuna með örtrefjatusku eftir að búið er að þrífa hana.
Alltaf þarf að gæta þess að þéttiraki myndist ekki innan á rúðum þar sem vatnið getur valdið rakaskemmdum á körmum, sólbekkjum og í gluggakistum. Sjáist merki um þéttiraka þarf að lofta betur út í húsnæðinu. Fara þarf reglulega yfir stormjárn og gluggakrækjur til þess að tryggja að ekkert þurfi að gera við eða endurnýja.