Húsaleigubætur

Reiknivél húsaleigubóta: Smelltu hér

Hvað eru húsaleigubætur:
Lög um húsaleigubætur nr.138/1997 tóku gildi 1. janúar 1998.
Markmið laganna er að lækka húsnæðiskostnað tekjulágra leigjenda og draga úr aðstöðumun á húsnæðismarkaðnum.
Umsókn um húsaleigubætur skal skila til þess sveitarfélags þar sem umsækjandi á lögheimili.
Þurfi fólk á upplýsingum að halda um rétt sinn til húsaleigubóta eða annað sem tengist greiðslu húsaleigubóta er því bent á að hafa samband við sveitarfélagið þar sem viðkomandi er skráður með lögheimili sitt en einnig má benda á ítarlegan bækling sem félags- og tryggingamálaráðuneytið hefur gefið út: Smelltu hér
Fjárhæð húsaleigubóta ræðst af fjölskyldustærð, fjárhæð leigu og tekjum viðkomandi.

Hverjir eiga rétt:
Þeir leigjendur eiga rétt á húsaleigubótum sem leigja íbúðarhúsnæði til búsetu og eiga þar lögheimili. Uppfylla þarf eftirtalin skilyrði varðandi húsnæðið:
• Íbúðarhúsnæðið skal vera skilgreint sem íbúðarhúsnæði hjá byggingafulltrúa.
• Íbúðarhúsnæðið verður að vera a.m.k. eitt svefnherbergi ásamt séreldhúsi eða eldunaraðstöðu og sérsnyrtingu og baðaðstöðu. Ekki eru greiddar húsaleigubætur vegna leigu á einstaklingsherbergjum eða ef eldhús eða snyrting er sameiginleg fleirum.
Undanþegnir ofangreindu eru fatlaðir einstaklingar á sambýlum og námsmenn á framhalds- og háskólastigi sem leigja herbergi á heimavist eða á stúdentagörðum.

Hvernig greiddar:
Húsaleigubætur eru eftirágreiddar og koma til greiðslu frá og með þeim mánuði sem réttur til bóta hefur verið staðreyndur. Sveitarfélögin skulu greiða bætur út mánaðarlega eigi síðar en 5. dag hvers mánaðar.

Gildistími og endurnýjun:
Umsóknir um bætur skulu berast bæjarskrifstofu á eyðublöðum sem þar fást 15 dögum fyrir fyrsta dag greiðslumánaðar. Sækja þarf um húsaleigubætur fyrir hvert almanaksár og gildir umsóknin til ársloka. Umsækjendur þurfa að endurnýja umsókn sína fyrir 16. janúar ár hvert til þess að greiðslur falli ekki niður. Húsaleigubætur eru ekki greiddar lengur en gildistími húsaleigusamnings segir til um.

Umsóknir
Útfylltri umsókn skal skila til félagsþjónustu þess sveitarfélags þar sem umsækjandi á lögheimili. Flest sveitarfélög notast við umsókn frá félags- og tryggingamálaráðuneytinu en önnur líkt og Reykjavík og Kópavogsbær hafa gert eigin umsóknareyðublöð (tenglar hér fyrir neðan).
Umsóknareyðublað um húsaleigubætur gerir aðeins ráð fyrir einum umsækjanda svo húsaleigubætur greiðast aðeins til eins íbúa leiguíbúðar. Leigjendur verða því að koma sér saman um það hverjum skuli greiða bæturnar. Allir íbúar, 18 ára og eldri hins leigða húsnæðis þurfa að skrifa undir umsóknareyðublaðið.

Umsókn frá félagsmálaráðuneytinu

Reykjavík

Kópavogur

Fylgigögn:
Flest sveitarfélög óska eftir neðangreindum fylgigögnum með umsókn um húsaleigubætur og afgreiða þau ekki umsóknir fyrr en öll fylgigögn hafa borist.
• Afrit af síðasta skattframtali staðfest af skattstjóra.
• Launaseðlar þriggja síðustu mánaða allra heimilismanna.
• Frumrit þinglýsts leigusamnings á staðfestu samningseyðublaði félags- og tryggingamálaráðuneytis eða Íbúðalánasjóðs. Þetta ákvæði á ekki við um félagslegar leiguíbúðir.
• Staðfesting skóla um nám barna umsækjanda sem eru eldri en 20 ára og stunda skólanám í sex mánuði eða lengur á árinu.
• Staðfesting á lögheimili í íbúð frá Hagstofu Íslands eða útprentað úr þjóðskrá.

Þinglýsing:
Þinglýsa ber húsaleigusamningi. Frumrit leigusamnings er afhent embætti sýslumanns í því umdæmi þar sem fasteignin er staðsett. Ekki er þó skylt að þinglýsa leigusamningi vegna íbúðar í eigu sveitarfélaga eða félaga sem eru að öllu leyti í eigu sveitarfélaga.

Skerðing bótaréttar:
Áhrif tekna og eigna á fjárhæð húsaleigubóta:
Bætur skerðast óháð fjölskyldustærð í hverjum mánuði um 1% af árstekjum umfram 2 millj. kr., samkvæmt reglugerð um húsaleigubætur. Einnig hækkar tekjugrunnur um sem nemur 25% af nettó eignum umfram 5.918.453,-* (*miðað við 1. jan. 2010 skv. breytingum á neysluverðsvísitölu)

Sjá líka reiknivél: Smelltu hér

Réttur fellur niður:
Þrátt fyrir að almenn skilyrði bótaréttar séu uppfyllt þá er réttur til húsaleigubóta ekki fyrir hendi í eftirfarandi tilfellum:
• Ef ekki er um að ræða íbúðarhúsnæði
• Ef um sækjandi, eða einhver annar sem býr í húsnæðinu með honum, nýtur réttar til vaxtabóta þá á hann ekki rétt á húsaleigubótum. Þannig ber alltaf fyrst að láta reyna á rétt til vaxtabóta
• Ef leigusamningur er til skemmri tíma en 6 mánaða
• Sjá einnig 15. grein laga um húsaleigubætur

Sértækar húsaleigubætur:
Sveitarfélög hafa heimild til að greiða út hærri bætur. Sveitarstjórn getur tekið ákvörðun um að greiða hærri húsaleigubætur en sem nemur fyrr nefndum grunnfjárhæðum, svokallaðar sérstakar húsaleigubætur. Sérstakar húsaleigubætur eru ætlaðar leigjendum sem búa við mjög erfiðar félagslegar aðstæður. Stuðningurinn er tengdur leigjandanum sjálfum í formi sérstakra bóta sem taka mið af persónulegum aðstæðum í stað þess að tengjast íbúðinni. Sveitarfélög veita nánari upplýsingar um fyrirkomulag sérstakra húsaleigubóta.

Nánari upplýsingar:
Þurfi fólk á upplýsingum að halda um rétt sinn til húsaleigubóta eða annað sem tengist greiðslu húsaleigubóta er því bent á að hafa samband við sveitarfélagið þar sem viðkomandi er skráður með lögheimili sitt.

Bæklingur félags- og tryggingamálaráðuneytisins um húsaleigubætur

Alþingi – Lög um húsaleigubætur